ప్రముఖ సినీ నటి, మోడల్ షెఫాలీ జరీవాలా (42) గుండెపోటుతో కన్నుమూశారు. శుక్రవారం రాత్రి ముంబైలో ఆకస్మికంగా గుండెపోటుకు గురై ఆమె తుదిశ్వాస విడిచారు. ‘కాంటా లగా’ మ్యూజిక్ వీడియోతో దేశవ్యాప్తంగా పాపులారిటీ సాధించిన షెఫాలీ, సినిమా, టెలివిజన్, వెబ్ సిరీస్ రంగాల్లో తనదైన ముద్ర వేశారు.
గుజరాత్‌లోని అహ్మదాబాద్‌లో 1982లో జన్మించిన షెఫాలీ, 2002లో ‘కాంటా లగా’ రీమిక్స్ మ్యూజిక్ వీడియోతో ఒక్కసారిగా ఫేమస్ అయ్యారు. ఈ వీడియో యూత్‌లో భారీ ఆదరణ పొందడంతో ఆమె ‘కాంటా లగా గర్ల్’గా పేరొందారు. ఆ తర్వాత హిందీ చిత్రం ‘ముజ్సే షాదీ కరోగి’లో సల్మాన్ ఖాన్, అక్షయ్ కుమార్, ప్రియాంక చోప్రాలతో కలిసి నటించి మెప్పించారు. కన్నడ చిత్రం ‘హుడుగురు’తో పాటు పలు సీరియళ్లు, వెబ్ సిరీస్‌లలోనూ ఆమె నటన కనబరిచారు.
2019లో హిందీ ‘బిగ్ బాస్-13’ రియాలిటీ షోలో కంటెస్టెంట్‌గా పాల్గొన్న షెఫాలీ, తన స్పష్టమైన వ్యక్తిత్వంతో ప్రేక్షకుల దృష్టిని ఆకర్షించారు. అలాగే, ‘నాచ్ బలియే’ సీజన్ 5 మరియు 7లో తన భర్త పరాగ్ త్యాగితో కలిసి పాల్గొని నృత్య ప్రతిభను చాటుకున్నారు. 2018లో ALT బాలాజీ వెబ్ సిరీస్ ‘బేబీ కమ్ నా’లో శ్రేయస్ తల్పాడే సరసన నటించారు.
షెఫాలీ 2004లో సంగీతకారుడు హర్మీత్ సింగ్‌ను వివాహం చేసుకున్నారు. ఆమె ఆకస్మిక మరణం బాలీవుడ్ వర్గాలను షాక్‌కు గురిచేసింది. సినీ పరిశ్రమలోని పలువురు ప్రముఖులు ఆమె మృతిపట్ల సంతాపం వ్యక్తం చేస్తూ, సోషల్ మీడియా వేదికగా నివాళులు అర్పించారు. షెఫాలీ జరీవాలా మరణం సినీ, టెలివిజన్ రంగాల్లో తీరని లోటును మిగిల్చింది.
