అక్కినేని నాగచైతన్య నటనకు వరుసగా ప్రశంసలు దక్కుతున్నాయి. తాజాగా ముంబైలో జరిగిన మొట్టమొదటి ఇండియన్ నేషనల్ సినిమా అకాడమీ (INCA) అవార్డుల్లో ఆయనకు తెలుగు విభాగంలో ‘ఉత్తమ నటుడు’ అవార్డు లభించింది. ఇటీవల తెలంగాణ గద్దర్ అవార్డు గెలుచుకున్న చైతన్య, ఇప్పుడు ఈ జాతీయ స్థాయి గుర్తింపును అందుకోవడం విశేషం.
శ్రీకాకుళం మత్స్యకారుల నిజ జీవిత కథ ఆధారంగా తెరకెక్కిన ‘తండేల్’ సినిమాలో ‘తండేల్ రాజు’గా నాగచైతన్య కనబరిచిన నటన అందరినీ ఆకట్టుకుంది.
ఈ సందర్భంగా ఆయన మాట్లాడుతూ: “తండేల్ రాజు పాత్ర నాకు ఎంతో నేర్పింది. ఆంధ్ర మత్స్యకారుల జీవితాలను తెరపైకి తీసుకురావడం మర్చిపోలేని అనుభూతి. ఈ గౌరవం దక్కడానికి కారణమైన దర్శకుడు చందూ మొండేటి, నిర్మాత అల్లు అరవింద్, బన్నీ వాసు, నాయిక సాయి పల్లవి మరియు ఇతర బృందానికి నా ధన్యవాదాలు.”
సుమారు 12 సినీ పరిశ్రమలకు చెందిన ప్రముఖుల సమక్షంలో జరిగిన ఈ వేడుకలో నాగచైతన్య అందుకున్న ఈ పురస్కారం, ఆయన కెరీర్లో ఒక మైలురాయిగా నిలిచిపోనుంది.
